ديوان الشاعر سالم بن محمد باتيس ابوراضي الاول

الاخوه الكرام
يسرني ويسعدني ان انقل لكم بعض قصائد الشاعرالمرحوم سالم بن محمد بن عمر بن بلخير باتيس
ابوراضي الاول
ارجوا ان تنال اعجابكم ورضاكم
قصيده غزليه

قال المعنى في الداجي فقد رشده=قاسى شدايد وغيظه بالحمق مكظوم
لاعتم الليل بوراضي يجر قهده=ساعه تقلب على جنبي وساعه قوم
يالله عسا اللطف لي من واسع المده=ضني ومشكاي لك ياحي ياقيوم
ذبتني اشواق من ذي قد فرق خده=وفي جبينه كتاب الفارسي مرسوم
اهيف ترف له شرف مايختلف وعده=والغره الباهي مثل القمر مقسوم
وتقول كفلت شبك لاقد نسع جعده=يغذاه بلمسك والعطر الشذي المشموم
واعيان حور الحدق تقتل بلا هده=كل من نظر لمحت اعيانه ضوى مغروم
والخشم منصوب كأنه سيف في غمده=والعذب بين الثنايا يشفي المسقوم
وكعوب حفّل كما الرمان في وهده=والصدر ميدان للظمّر تجي زمزوم
والبطن طاقه حرير اخضر من الكده=اصلي من العال جاء من مصر وارض الروم
والخصر كأنه لبو يدرج على الجده=وتقول ثعبان ذي هو بل حمه مسموم
والعجز مركب منول لاقدا جده=خاض القلازم وبحر الهند والفيوم
في خنه الخمر يسكر من بلغ عنده=افيون مفنون فيه الطب للمحموم
سيقان فيها الهلب شده قفاء شده=واقدام لاديعوا وداي ضوى مرحوم
ياهركلي يارضي ياخيل في قنده=يافايق الغيد ياخرعوب يامهضوم
سالك بخير الوراء عبدك يصل قصده=عالباب واقف ولا هو في الهوى مليوم
القصد قصده ولا بايختلف وعده=مازال عاد النسم يجري في الحلقوم
انه يباء مال بالعطيه لايده=بعطيه جاوه ومسقط والحبش والروم
وارض الاروبه وباريس الذي سده=واراض مدراس ذي فيها خزين القوم
والصين والشين والبصره مع جده=والهند والسند هو والشحر ذي محكوم
والفين مهره تربت بلد صعده =والفين بكره عندي في العدد ملزوم
والفين ميزر جرامل ذي لها رده=والفين ميزر جرامل عالمقص محكوك
هذا في المهر والتقدوم بامده=الاف واكرور من جنه الذهب مختوم
وقهوة الخال يوخذ عطفة الجعده=وارض الكثيري ويوخذ صاط باكرشوم
هذه ملاكه وبلقي فوقها بنده=والناس في خدمته راضي وحد محتوم
وانه يباء السيد بوراضي يقع عبده=باسير في الامر من تحت الطلب محكوم
والختم صلوا على من لانبي بعده=صلاه تغشى ضريح الهاشمي المعصوم
والال والصحب والنورين من بعده=وعمر وبوبكر عندي في العدد ملزوم
والرابع الشهم لي سيفه روى حده=واهل المدينه ومن هاجر معه في القوم

ساعد في النشر والارتقاء بالمجالس عبر مشاركة رأيك في الفيس بوك

قصيدة الشاعر الراحل سالم بن محمد ( بن بلخير ) باتيس ابوراضي الاول
وهي رثاء في لجهر عمر ويسلم باعمر بن عبد

ألا يا الله يـــــاربنا بالحــــــــــــــــــــــــال تعلم =خفايا الســــــــــــــــــــر تعلم بها يا حي قيّوم
ولا با ســــــــــال غيرك عســـــا تغفر وترحم =جميع النــــــــاس ما حد من الزلات معصوم
وبوراضي غفــــــــــــــر له ذنوبه ما تـــــقدم =في الدنيا وفي الاخرى عسا يسلم من الشوم
نهـــــار البعث يــــــــــــارب تلطف من جهنم =ووادي ويل ذي فيه كمّن داب مســــــــــــموم
وجيز الجســـــــــــــــر وأدخل في الجنّة تنعم =ومتعنا النظـــــــــــــــــــــر فيك لا يا حي قيّوم
وثاني فصـــــل دمعي من أعيـــــــاني تهذرم =على الأجواد كمّن جبـــــــــــــل قد بات مهدوم
على لعلا ولسفل فواد القلب مســـــــــــــــتم =على الأجواد ذي قد نقوا من حيد صمصــموم
روازم ما تزعزع وكمّن شــــــــــامخ أصيم =حزوم القبـــــــولة قد صبح في الجيف مهدوم
عتيم الليل جـــــار الســـــهر لا الداجي أظلم =كما المــــــــــــارود من به منينة بات مهموم
على لـــــجهر عمر يا حسوفي هو ويســـلم =ويا حــــــــــــــــزن القبيلة ويحزن كل ماشوم
وحـــــزن الضيف لقبل على المطرح وقــدّم =ضواه الحزن وأمســـــــى على لجواد مهموم
ومن عـــــاده غبين با يجيه الفكـــــر والهم =وذي بالبحر بايبلغه ذا العلم ماشــــــــــــــــوم
وحـــــزن الملـــــــــــــــزمة يفتقد لا قد تقدّم =يشــــــــــــل قسمين ما يلقي التعلوق مقسوم
ويفصح في هـــــروج المقـــــــــاعد لا تكلم =نهـــــــــــــــــــار الوعد لا قد تعكى كل عمعوم
ولا حـــــــــــــــــاذق يصل عندهم وإلا مقدم =ولا الشــــــــــبان عالشان كمّن عظم مصموم
ويا فقدي لهم لا قد الـــــــــــــــــــباروت قتّم =متى لا صبّح الخصـــــــــــــــم لا له دم مظلوم
يعزونه بشـــــــــــــغل الجرامل معدن السم =وحب الذايبي ذي على المشــــــــواف محكوم
عليهم يا البنـــــــــــــــــات اندبن كلا تهذرم =وقولن ضـــــــــــــاع زبن القبيلة بات مهـدوم
وضاع العز من بعد لجهــــر هو ويســــــلم =وضاع الجمل والقبولة ضاعت من اليــــــــوم
عليهم حـــــــــــس نيران في جوفي توهجم =وهــــــــــان العظم من بعد ما قد كان مصموم
نذير الموت خذهم وســــــــــــــهمه قد تقدّم =بحكم الله ذي قد ســـــــــــــــقاهم كاس مسموم
ولو يفداه بعض العرب ماباه يســــــــــــــلم =ويوخذ لربعة وإن يبى ســــــــــــــتة من القوم
ولكن القضــــــــــــــــاء والقدر حكمه تقدم =على وعد المنية نذير المــــــــــــــــوت محتوم
جزاه الحمد ماحد من المقدور يســــــــــلم =ولا يظلم دقيقة ولا في العمـــــــــــــــــر مظلوم
جزاهم جنّة الخلد فيها الخير يســـــــــــعم =ويرحمهم برحمته ســــــــــــــــــعفة كل مرحوم
ســــــــــلفهم في خلفهم ويجعل خيرهم جم =ويظهر بعدهم في الخلف من رأس صمصــــوم
وعيضة زاجية من بعدهم من طاهب أدهم =يقع موســــــــــــم في المال للحرثان صمصوم
ويا العاني ســــــــرح لا تهاب البعد تتهتم =وشـــــــــــــل الخط ذي هو بشكل النقط مرسوم
سرح من جول ســــــدة حمى كمّن محمم =مقر الصـــــــــــــــــــــاط ذي دربوها كل جهدوم
طريقك في المجر والســبل ذي فيه تسعم =قبل همّـــــــــــــــــــــــام ذي عندهم لايم ومليوم
وللســــــــــــــنبك قصد طين قهوة للمقدم =وربعه كلهم وأعــــــــــــــــــزهم في كل مرحوم
قصع لركاب خافك من الجـــــــيلان تهتم =ويبدا حصـــــــــــــــــن زين النوب مبناه محكوم
شــــــنف لجواد في ضعن تلقى فيه يسلم =وســــــــــــــــالم بن عمر عندهم للضيف تقدوم
وباتلحق حســـــن وأخوته يا كمّن أشهم =عيال أنمــــــــــــــــــار مافي عيال الذيب مذموم
وقل هذا عزاكم في الضرغام لشـــــــهم =ولا وقعت فســـــــــالة وقع مخلص على السوم
وقل يا المعتني جيت شــــــــــوني باتكلّم =ومتقهــــــــــــــــــــوي وأبى منكم مطلوبي اليوم
وشـــوا ماسار مافيه شئ قصرة ولا ذم =ومن يطلب خلاف القدي شــــــــــــــــوفوه مليوم
وهذا القصد والعظم بعد الكســــــر يلحم =ومن صالى بعيــــــــــــره خطر لا العظم مصموم
وبختم بالنبي عد ما البارق تبسّــــــــــــم =وحط النزل وأمســــــــــــى على الوديان حيطوم
حبيب القلب ذي شــــرّف الكعبة وزمزم =وقام الدين وأصبح ظـــــــــــــــلال الكفر محطوم

يا الله يا ذي عليك المعتمد=يا رافع السبع ذي متعليات
والأرض قامت على غير العمد=وكلها على الهوى متعمدات
جلا جلاله ولا يشركه حد=كم من مخاليق فيها واجدات
ويسهل أرزاقهم من غير كد=ما حد بلا قوت في حكمه جهات
الحمد لله مايحصى عدد=عدة مزون القنوف المطهبات
عد الورق في العضى هي والزبد=والحب والطير وأصناف النبات
سبحانه الواحد الفرد الصمد=ذي قد تكرم علينا بالثبات
يغفر لنا ما تقدّم في الرصد=من قبل نضوي القبور المغدرات
لا هم دنيا ولا شاساً لحد=ولا من الخصم لا ضلى وبات
قم يا المعنى سرح في بحر شد=وأربع حلق والوسور المبهمات
في ظهر مندوب ما مثله يجد=تسرح غداويه مثل الحايمات
إسرح مع الفجر لا عمّد ومد=من جول سدّة على طيب النيات
طريق وادي قضاعة على المقد=يمنة ويسرة بروس المفرعات
أشعاب فيها النمارة والأسد=وربّت القشع هو والموفيات
واندره في الضرك من تحت الزيد=في حيد بين الذلوق النايفات
القرن سدّك تحذر يا ولد=على الجيف زمرة حصونه حربيات
والبحر سدّه يلاطم بالزبد=كم من منحس من الموجات فات
شرقي وقبلي قبل روس الزيد=مثل الثريّا غلوبن عاليات
زر عند محسن وعمه بن خلد=تحصل كرامة على طيب النيات
وقل لهم قال سالم بي رمد=ما بى العمى في عيوني والفوات
عيدان غابت ولا فيها نقد=ماحد نجر للسهوم العابرات
من تحت مخية وريّض للمرد=خذ لك سيارة وعرّب لك بتات
في العطفة العاصيّة كم من ولد=غرّان فيها وباتلحق ثقاة
حيث المسنة تكسرها جند=كم من مسلجم نيابه واشرات
ذي يخلطون المصفّى بالرشد=وعتّبوا في القروش الفليات
حد الهلالي كما كير الحدد=يومي وليلي نياره راشنات
مرماك للوجر تلحق بوحمد=خصّه سلامي ولأصحابه ميات
تلحقه في الدار يكرم من قصد=ما يفتشل به ولو ضلى وبات
ويطرح الكي من فوق العمد=من سمح يطرح مكاوي ناجحات
وأنفذ قدا بن مسلّم خو حمد=يومه من أصل الرجاجيل الثقاة
محسوب منسوب من أبٍ وجد=يرعض سيول الشعاب المفرعات
قل له يناصح رفيقه ذي ورد=لا يطرح الذري في نجم الحوات
وقل له الكير عاده ما برد=يا ذي سهنتوا نياره طافيات
لا ردّوا أهل الحراثة والحدد=با يشتعل على العوايد لوّلات
إن عاد ربك دركهم بالمدد=عاد الرجاء زين في جزل الهبات
بين المناميس لا ضلى وقد=ساعة وبا يقطعون الحنيات
وذي في البحر ناره في الزرد=لقوه قوت العلوق الغاليات
مازال شمسان مابي شي قهد=ما هو على شي بواسق مفرشات
والختم يا بوحمد ماحد لحد=ما عود ما قد تجمع للشتات
والختم لمشاط ذي هي في الزرد=ألقوه قوت العلوق الفنيات
وألفي صلاتي نكررها عدد=على المصطفى ذي تشفع للعصاة
وآله ولصحاب رزبة من جحد=ومن تبعهم من الناس الهداة
ما قد طلع عزوري وإلا سجد= وقال خيراً من النوم الصلاة

مرسله الى عقال الباتيس واعيانهم

يا المعتني بكرة وســــيرك في عجل = من عذر ســــــدّة بالعول محميّة
لا هي على فرضـة ولا هي ع عجل =من رحمة المولى عســا مسقيّة
من عند بوراضـــــي توكّل ع الوكل = إســــــــرح وقل يالله بطيب النيّة
لا وادي الـــــــرحمن منفوح الحول = طريق ســــــــمحة بالحجر مبنيّة
لا حد غلمة ذي يشــــــــانون الدول = حيث البواسق في الحجل مسبيّة
احسين زر عنده بســـــاعة ماتصل = قل خــــــــاطرك يا راعي القطبيّة
وأطلب كرامـــــــة للقبيلة في عجل = عسا الحمة يا سيّــــــــدي مرقيّة
وأجزع قدا لـــــخوة مدا قهوة جفل = أهل الغــــــــــروس الزينة الفنيّة
لا عند من منصـــــور قيدوم العول = يوم الجمــــــــــالة عندهم مدعيّة
والحصن لسفل ذي على صم الجبل = حلّــــــــــوة غلمة ينجحون الكيّة
والجانب الشرقي على أهله باتصل = للمصـــــنعة ذي في الجبل مبنيّة
تلحق عمر ذي قد بناء فيها وحــــل = ملقي شــــبك فيه الغون مرسيّة
ذي يعـــــرف الدوار في لعب الحيل = وأخوته عنده ضربهم صـــــدريّة
وأنشد على لجهر عمر زبن العول = ذي مايشوف النار في المحضيّة
لمّا توسع كل ســـــــــــاعة في ذبل = عاد الهوارش بالحمة مســـــقيّة
وخو حمــــــــد صوته يزوّع بالجبل = مبعد زجم راعده في منشــــــــيّة
وبوعوض بلّغه مني ماحصــــــــل = ذي يعرف الحيــــــوان بطن الحيّة
وبـــوعمر صالح وبن صالح عمر = يقروا طلاســـــــــم في ختم هنديّة
شوا عندكم حشوان في العطفة همل = ما يعــــــــرفون الحجة المقفيّة
سلّم على الحذاق وأنشد ع السقل = ما لاح بارق في علا منشـــــــــيّه
وقــــل لهم نومي من أعياني زعل = من جـــــــور مابي والكبد مضبيّة
لمّا متى الغفلة وســـرتوا في هول = جميع لعضاء على العمــد مكويّة
قدها سنة عدّت ولا رأس إســــتقل = من لا رفع رأســــه عسا له حيّة
كلن يرد نفســـــه ويخرج من عمل = من قبل تعلم لــــــــــنس والجنيّة
وبا لقع عبرة وللعالم مــــــــــــــثل = من شـــــــــــرقها للغرب للنجديّة
والمــــال له يخرس وللنخل الجعل = والســــــــوس للغلات ذي مخبيّة
المال ماهو كسب و الكسب العول = مغبوط كل من هو يـــــراعي زيّه
كل من كسبهم حيث شــفّه با يصل = لو با يحـــــــــــارب لنس والجنيّة
وإن حد معه قصرة عسا إنه ما يصل = تقصر حبـــاله تنقطب ع الخيّة
ولا يصل قصده ولا يبلغ لمــــــــــل = بجــــــــــــاه مولى الكعبة المبنيّة
وذي ظهر زمزم وذي أرسى الجبل = وذي بطيبة قبته مـــــــــــــــزويّة
وإن حد حمس يحمس ولا عندي زلل = شــوني في أخواني معي حنيّة
هرجي صبر طعمه وفي الباطن عسل = يعرفه من يمضـي على قافيّه
وبعد يا العاني مع الـــــــــوادي قبل = شوحط تشفّه ســـاعة العصريّة
حد العلي محمي كما عذر الدول = في حدهم تقمــــــــــــــس بلا جنبيّة
سلّم على أهله عد ما البرق إشتعل = وما زجم راعده في منشـــــــيّه
طرّب عليهم للســــــمر ساعة تصل= من عندهم إن عاد شــــئ رديّة
وإلا تهذرنا كما الــــــــــــنوب الحلل =والظن في المولى عســــا فكيّة
يغفر لنا ما قد تقدّم في العمـــــــــــل = ولا يــــــــــــواخذ بإختلاف النيّة
والختم ذي يمســـــــي يزوع بالجبل = على المخــــــــلّف حيث له حنيّة
لمشاط من خمسة في المسبت جمل =فوق الجــرامل هي ويا التركيّة

قصيدة الشاعر سالم بن محمد بن عمر بن بلخير ابوراضي الاول
مرسله للشيخ عمر بن حسن العمودي

أبدأ بمن صوّر آدم من صميم الطين=من كل طينة خلقه الله سبحانه
من طين لازب كدر سواه باليدين=وآمر بلملاك تسجد دون شيطانه
عاصي وحط الخصومة لا نهار الدين=وأوعده رب السماء يدخله نيرانه
مثله صلصال قبل الروح خذ له حين=وآمر على الروح تدخل فيه كرهانة
حواء من آدم خلقها ناقصة ضلعين=بنته وزوجته في عشقته ولهانة
هي حظها في الثلث وآدم في الثلثين=هن من شماله وهم خرجوا ما أيمانه
وألقى له الرأس وألقى رجول واليدين=والقلب حافظه ربه معدن إيمانه
فضّل لنا آيات فيها كل مقرأ زين=يا صاحب العقل فكّر كيف فرقانه
ما خلقت إلا لكم يا أيها الثقلين=ومن ذرى ذري با يجنى من أغصانه
وبعد قم يالمعنى وأتكل ذا الحين=من صاط باتيس ذي محمي برميانه
مطيتك طير ذي هو حامل إجناحين=من ماركة مسجلة يسرح من الخانة
ما يدحق القاع ذي فيها الحصى والطين=يعبر في الجو في رقصة وحنانة
لا حد ذي هم يحطوان القذى في العين=لقرين بن سعد فيه أجواد حلانه
وأنشد على الشيخ ذي منسوب منسب زين=كريم ليمان لا قصدوه ضيفانه
تلحق عمر بن حسن ذي هو على الجدين=خصه سلامي وتفصيله لجيرانه
قل له معي خط مغري فيه لك سطرين=وعبود يفتيك في وجهه وعنوانه
صاحب في الله عندي مثل نون العين=ويابن عمر صاحبك في حسب عدانه
تحقيق ما قلت لك ماشي معي قلبين=والله قاله وينطق مافي قرآنه
ما بنت لشراف ذي هي كاحلة عينين=سارت عليهم وهم حشوا بها الزانة
هذا عملها وهم تبعوا عملها الشين=كل من ذرى ذري با يجنى من أغصانه
وايش عاد باقول لا شار العرب قسمين= كلاً شماله وقع شاهد على أيمانه
لو شي خبر سار لو با ننقسم قسمين=يشهد عليهم وبحر النون ميثانه
النون والجيم والراء ميم هو والسين=وألفين في الحاشية هابوا تمحانه
ذا ذي حصل وأعذروا زادت علي بيتين=سلام وأعلام ياذي زاهد ألحانه
في سبع شوال باورّخ بيوم أثنين=بعد الثلاث المية والألف في إعلانه
من هجرة المصطفي السبع والخمسين=عليه صلوا عدد ما ثجت أمزانه
هم قاتلوا مرحب في نهار حنين=قاموا على الدين لما قامت أركانه

سبح الرعد

ألا يـــا الله يـــا مـنـشـي الـبــارق و لـمـطـار=بحـمـدك سـبـّح الـرعــد فـــي راس النـشـيـة
عـلـى روس المسـاقـي بـيّـت غـيـث مـــدرار=بـسـاعـة سـعــد تـمـسـي خـواطـرنـا سـلـيــة
ونمسـي فـي نعـم بعـد كثـر الشـوش وأفكـار=بـجـاه أهــل السـلـف والنـبـي خـيــر الـبـريـة
عسـا عيضـه فـي الـمـال نـرجـا فـيـه لثـمـار=مـواســم زاجـيــة لأهـــل لــمــوال الـزجـيــة
نـجــوم الـخـيـر ذي واردة عـ الـنـاس لـخـيـار=وكـلـن بـايـقـع لـــه عـلــى مـــا قـــد هـويــة
ضوى هاجسـي ينقـح علـى طاسـة ومزمـار=وحـكّــم قـــول شـافــي كـمــا طـعــم الـبـغـيـة
وجـل الشـوش منـي وأنـا فـي طـسـت فــوّار=مـن أهـل الوقـت ذي شـافـوا العـوجـا قـديـة
زمــن مـكّـارذي يخـلـط الحـالـي مــع الـقــار=يـحـط الـمــر هـــو والـصـبـر فـــوق البـغـيـة
دواء لـصــواب جـابــوه وأحــمــوه عـ الـنــار=يزيـح الـجـوف بـعـض الــدواء ســم المنـيـة
ومــن ذي جــاب هــذا الدواء يـاهـل التفـكـّار=وجـابـه للـعـرب شـوفـوه مـقـطـوع الـرجـيـة
ومـولـى العـيـد قــد جابهـ وقـد ضــواه لـلـدار=وعـــاد الـشـهـر مـقـصـي الـمـنـازل لـوّلـيــة
وفرحـوا نـاس جـم يـوم جـاهـم عـيـد لفـطـار=وقـالـوا أتعـبـت أهــل الـقـضـاء يالشافـعـيـة
ومـــن لا رد نـفـسـه يـبـونـه يــدخــل الــنــار=عـســا يـلـطــف بــنــا مـن زمــان الجـاهـلـيـة
قبـل ياهاجـسـي مـاجـاك مــن سـمـح صـبـار=دخـل فـي الغـوط مـن شــاف موكـاتـه قـويـة
ويالعانـي سـرح وأودعــك محـكـوم لسـطـار=مـن الشرقـي تـوكـل ســرح فــي طـيـب نـيـة
شـــروق الـشـمـس لا ذرّت البيضاء بلـصـبـار=جــزع فــي حــد ذي هـــم يـغـتـون الـسـريـة
كما فرضـت عـدن ذي عليهـا الخيـر سنجـار=تـصـبـحـهـا فــلـــوك الـفـرنــجــة والـعـلــيــة
مـراســي لــلــدول كـلـهــا يـمـنــة ولـيـســار=وفـيـهـا ســـوق بـيــن الـبـيــع والمـشـتـريـة
تقبـل حيـود سمـحـة ســرح عالـرجـل سـيّـار=وعـيـنــك لا تــشـــط للـمـعـاصـيـر الـقــويــة
جزع في صوط محمي من السـارق وغـوّار=حـمـوه أهـــل الـجـرامـل بـشـغـل النامـسـيـة
على أهـل الحنـو سلّـم علـى غايـب وحضّـار=كـنــان الـــرأس لا ثـــارت الــشــارة قــويــة
قـبـل هـمـام فيـهـم لـنـا عـانــي وحـــد جـــار=ولا تـرمـي ســوى حـيـث لــك واجــب ونـيـة
وصـل حـصـن الغليـلـة وتلـحـق فـيـه بيـطـار=حـــزوم الـقـبـولـة لا بــــرق رأس الـنـشـيـة
جزع في شعب مضمو عسا لـه روع مبـدار=ولا شـفــيــت تــوخـــذ طـريــقــك بـالـقــويــة
قـصـد لا ظـعــن يالمعـتـنـي مـرمــاك لـلــدار=قـصـد للحـصـن ذي هـــو قـصــوره معتـلـيـة
وبــا تلـحـق حمـولـه عـلـى ليـمـن ولـيـسـار=عــلاج الـحـرب مـــن شـافـهـم يـذكــر نـبـيـه
وسـلّـم لـــي علـيـهـم عـــدد ثـجــات لـمـطـار=ومـاحـنـت رعـــوده فـــي أربــــاع الـنـشـيـة
وبــو يسـلـم بـلـغ خــط مـنـه زيـــن لـسـطـار=بنـسـخـات الـقـلــم والـلـغــة عجمـاءعـجـيـة
ذكر لي في الخضـر يـوم قـد ميّـح وقـد سـار=ولا حــــد يـنــدهــق بـالـطـريــق الـهـابـطـيـة
طريـق الوعـل فـي الطيـن مبعـد حــط ليـثـار=يــجــي بـالـمـلـح قــدهـــا عــوايـــد أولــيـــة
ولاحـد يـذرى الـشـوك فــي مـالـه ولا الـقـار=شــف السـبـة تـجـي مــن مقاطـيـع الـرجـيـة
ومن به صوب جالب يقع في سعف من سار=ويـمـسـي قــبــر جــيــز الـقـبــور الـكـافـريـة
ومـن هـو داهـل البحـر حيـث الـغـوط مـهّـار=ولا هــــاب الــمــوج عــنــده الـدنـيــا دنــيــة
وأنـا باحـازي أهــل المعـانـي وأهــل لفـكـار=ولـكـن عـادنـي مــا مـعـي فــي لــرض نـيــة
أنــا بسـألـك وأنـتــه ســـأل الـنــاس لـخـيـار=ولــــد أو بــنــت عــامــد مــنــازل دولــويـــة
وملقي جيش تنظيمي وحكمـه قطـب مسمـار=وهـم فـي قبضـة أيــده عـلـى مــا قــد هـويـه
وفــي جيـشـه لـنـاثـي ويـوجــد فـيــه لـذكــار=*تــعـــاون بـيـنـهــم بـــالإشـــارات الــقــويــة
ونـعـم أهــل المـنـازل ونـعـم الـنـاس لخـيـار=وشـف مــن قــد كسبـهـم بـهـم نــال الحمـيـة
عـلـى الإســـلام مـاقــول ذولا نـــاس كـفــار=ولا حــــد يــدلــي إلا عــلــى حــجــة طــريــة
وبـخـتـم بالـمـشـفـع حـبـيـبـي نــــور لــنــوار=ومـن لــه حــظ يــا مــن حـضـر يـذكـر نبـيـه

بين القبوله والحكومه

أبدأ بمن قام الشريعة=ذي مالك العالم جميعه
عاصي وحد فيهم مطيعه=تغفر ذنوبي والخطيّة
ولا تواخذ من تولّع=القلب عاده ماتقنّع
في صاحبي مسمع ولرجع=لمّا يجي سهم المنيّة
عشقة معي في أول زماني=لبي بصوتي لا دعاني
واليوم هذا وقت ثاني=قلبي قنع وأيدي خلية
قلبي تشتت بين ثنتين=لا جملهن يعجب ولا شي زين
كلاً تبى فتوان ذا الحين=ولا لهن عندي هويّة
الأولة قدها قديمة=عجوز مرذولة يتيمة
في زامها مديت قيمة=وهي علي ماهي مريّة
والثانية تظهر وتغبا=والعجز فيها قد تربا
يا ريتها من لرض تغبا=ما منها إلا الأذيّة
ثنتينهن عندي خسارة=من قد كلف يكلف بعاره
ذي لومها ضاوي لداره=لكن ذه عذراء صبيّة
خاف إنها ما با تقع لي=ذلا تباني فارق أهلي
ترجع لعقد الزوج لصلي=وتقول لي منك بريّة
الأوّلة قد ذمت فيها=غابت علي لو بشتريها
با تذكر التقصور فيها=من بعد ما كانت رضيّة
الأوّلة قالت لأجلك=عبرت شفني باطل أهلك
ولا سهنت الذم منك=عاده يجيني و الخطيّة
شف ذي تحب الناس مرة=ما منها لك شي مسرة
من ملت منه مال شره=تتبع مقاطيع الرجيّة
كل من عشقها ما تربّح=حتى ولو عقله مرجّح
تندره من رأس المصبّح=وألقته في وسط الحجيّة
هذه نصيحة وأنت أعرف=شوفك على النايف تشرّف
لخبارها تصبح تلقّف=حبّك وذه تالي وصيّة
وإن كان ديليتوا فتوني=على أهلكم جدّت حزوني
سالت دموعي من عيوني=على هممهم لوّليّة
والثانية قالت هويتك=والله ما فارقت بيتك
وإلا من النايف رديتك=ما زلت تذكر لوّليّة
عجوز شولا ما تعينك=ما منّها إلا كفل دينك
والعهد ذا بيني وبينك=با قبضك عروة قويّة
أنا شف الناموس عندي=أكفي جميع الناس وحدي
في جلهم ضيعت جهدي=من طاعني قع له رضيّة
ومن عصاني يا ضياعه=خذته ولو قد طال باعه
ما با يعبّر طين ساعة=خل السمق هو والهويّة
قد خير لك ترضى بشاري=أنته تقع والدار داري
والموت ذي ع الناس جاري=ما عذر منه ع البريّة
أمسيت طول الليل قهدان=ما بينهن والقلب وحلان
ولا معي في الأمر فتوان=أما مع ذي هي شليّة
من منهن ذي با توافق=وبا تمد العهد صادق
عروة قويّة حبل واثق=ولا تجيني في الخطيّة
قلت أوقفي بنشد صحابي=شيبانهم وأهل الجنابي
لمّا تجي فتوى ونابي=من ذي يغتون السريّة
الرأي عاده للقبيلة=ما نا معد حوّل بحيلة
يا ذي ترومون الجميلة=شوا ذه حجج ما هي شليّة
في لرض جات أول مصيبة=من با يبدلكم بصيبه
حط الحلق فوق الحقيبة=ع الهيج والقصبة شبيّة
من منكم عنده بصيرة=وإلا بقوة با يحيره
مثل الصرر لا فاح ميره=بالفرق با ينذخ عشيّة
كل ما حصل قصدي وسولي=فاضت مع الوادي سيولي
شيبة وقد هانت رجولي=تغفر ذنوبي والخطيّة
ذي قد غفر لأم الكباير=يا بالكرم قل للعشاير
أحنا ويا جمع العشاير=من قبل حيضان المنيّة
والعفو بو راضي تعفف=على الثقل معاد يكلف
من بعض لشياء قد تخفف=با موت والذمة بريّة
وأختم بخير الرسل طه=فوق الحجب ذي قد قراها
في ليلة المعراج راها=صلوا على خير البريّة
صلى عليه الله وسلم=وأهل السماء كلاً تكلم
بفضل ح م المعظّم=يا من حضر يذكر نبيّة

قصائد رائعه وجميله
رحمة الله على ابو راضي والله يسكنه فسيح جناته
الف شكر اخوي طالب على كل هذه الجهود الجباره في تجميع وتوثيق قصائد الشيبان وشعار القبيلة
خالص شكري وتقديري

لاشكر على واجب اخي الوافي

درر ثمينه
رحم الله ابوراضي